Bhojpuria.com

मुंबई। कलर्स चैनल पर शुरू भइल भारत के सब से बड़का रियलिटी शो बिग बॉस-4 में बड़-बड़ लोगन का संगे भोजपुरिया गायक आ अभिनेता मनोज तिवारी भी एह प्रतियोगिता के हिस्सा बनल बाडन। उम्मीद बा कि मनोज अपना ठेठ भोजपुरिया अंदाज से दर्शकन के मनोरंजन का संगे-संगे एह अंतर्राष्ट्रीय स्तर के कार्यक्रम में भोजपुरिया कला अउर संस्कृति के छाप छोड़े के कोशिश करिहन। इहो मानल जा रहल बा कि एह से पाहिले बिग बॉस -1 में भी मनोज तिवारी के प्रतिभागी बनाये के कोशिश भइल रहे, लेकिन ऊ इंकार कइ देले रहलन।

मनोज तिवारी के हिसाब से उ एगो खास रणनीति के तहत बिग बॉस के प्रतियोगी बनल बाडन। उनकरा हिसाब से उ एह शो में जब तक बनल रहिहन,  भोजपुरी बोले के पुरजोर कोशिश करिहन, जेकरा से देश भर में भोजपुरी बोले के बढ़ावा मिली। ओकरा संगे खास कर भोजपुरिया संस्कार अउर आचरण के निभावे के भी भरपूर कोशिस करिहन ताकि दुनिया भर के भोजपुरिया संस्कृति आ संस्कार के बारे में पता चली।

मनोज तिवारी के बिग बॉस-4 में शामिल भइला पर भोजपुरिया दर्शकन का संगे-संगे पूरा भोजपुरिया फिल्म जगत से शुभकामना मिल रहल बा, अउर अगर दर्शकन के प्यार असहीं बनल रहल त मनोज तिवारी के फाइनल तक जाये से केहु ना रोक सकेला। भोजपुरिया डॉट कॉम का ओर से मनोज तिवारी के शुभकामना बा, आ हमनी का उम्मेद करब कि ऊ एह शो के जरिये भोजपुरिया झंडा के एगो नया उँचाई देस।