Bhojpuria.com

हमरा आजो याद बा जब कुछ महीना पहिले हमनी का सुर-संग्राम के बिहार आ उत्तर प्रदेश के लडावे वाला आचरण के विरोध कइले रहनी जा, त बहुत हाय-तौबा मचल रहे। कुछ लोग हमनी के पक्ष में त कुछ लोग विपक्ष में भी काफी बयानबाजी कइले रहे। लेकिन एह हफ्ता जवन कुछ भी सुर-संग्राम में देखे में मिलल, ओकरा से पुरा भोजपुरिया समाज से सिर शरम से झुक गइल।
 
भइल अइसन कि अपना बढत लोकप्रियता के भँजाये खातिर सुर-संग्राम में कुछ नया प्रतिभागियन के अश्वमेध यज्ञ के माध्यम से प्रवेश दिहल गइल। ओह प्रतिभागियन में से एक के कवनो गाना पर जब कल्पना कुछ कॉमेंट कइली, त विशेष जज का रुप में आइल भरत शर्मा कहले कि चूकिं एह लोगन के एह मंच पर इ पहिला प्रस्तुति हवे, ओह से एह लोगन के आलोचना ना क के ओह लोग के योग्यता के मूल्यांकन कइला के जरुरत बाटे। उनुकर एतना कहला के देर रहे कि कल्पना भडक गइली, आ भरत शर्मा से पुछली कि का ई राउर रिश्तेदार लागेले? ओकरा बाद ऊ इहो कहली कि केकरा पर का टिप्पणी करे के बा ई उनुका के केहू मत बताव, बल्कि ई फैसला ऊ खुद करिहें।
 
का कहल जा सकेला एकरा के? सफलता के मद में चूर एगो आइटम सांगे गाये वाली के अहंकार? या कि भोजपुरिया संस्कृति के माखौल उडाये वाला एगो बाहरी व्यक्ति के गुरुर? कम से कम केहू पर टिप्पणी कइला के पहिले ई त देखे के चाहत रहे कि सामने वाला के समाज में का कद हवे? भरत शर्मा से ई पूछल कि का ऊ राउर रिश्तेदार हवन, एकर मतलब उनुका पर साफ- साफ पक्षपात के आरोप लगावल रहे। हम एहिजा इहो पूछल चाहेब कल्पना से कि का ऊ अपना रिश्तेदार लोग के फाइनल में पहुँचवले बाडी। उनुका ई याद रखे के चाहीं कि आज जवन कुछ भी ऊ बाडी, खाली भोजपुरिये के वजह से बाडी। आ पचास गो कल्पना मिल के, आ पचास जनम लिहला के बादो शायद ऊ भरत शर्मा के पैर के धुल के बराबरी न क पइहें। एह तरह के गुरुर केतना आत्मघाती हो सकेला, कल्पना के शायद एकर अंदाज नइखे।
 
पिछला 2-3 दशक में भोजपुरी गायकी के पर्याय बन चुकल भरत शर्मा के कद का लगे कल्पना जइसन अश्लील गाना गाये वाली गायिका के का हैसियत बाटे, इ केहू के बतावे के जरुरत नइखे। अपना पुरा कैरियर में हमेशा भोजपुरी के विकास सोचे वाला आ अश्लील गीतन से परहेज करेवाला भरत शर्मा के एह उमिर में ओकर ई परिणाम मिली, इ त केहू सपनो में ना सोचले होई। हमरा त इहे नइखे समझ में आवत कि आखिर जवना कलाकार के मनोज तिवारी जइसन हस्ती हमेशा गोड छू के स्वागत करेले, उनुकरा उपर अइसन टिप्पणी करे के साहस कइसे जुटइली कल्पना?
 
ओह से भी ज्यादा दुर्भाग्यपूर्ण त इ रहल हा कि मनोज तिवारी ओहिजा मूकदर्शक बन के रह गइले, आ महुआ एकरा के एडिट कइला का जगह एकर प्रसारण क दिहलस। का गजेन्द्र सिंह आ महुआ चैनल के टीआरपी बढाये के इहो एगो तरीका लागत रहे? वइसे हाल में ही पटना के एगो अखबार में इहो छपवावल गइल रहे कि सुर-संग्राम टीआरपी के हिसाब से टेलीविजन पर देखल जायेवाला “टॉप 10 शो” में आ गइल बा, जवन कि सरासर गलत रहे। सच्चाई त ई बा कि अगर रउरा टीआरपी के लिस्ट चेक करीं, त रउरा के पता चली कि ई “टॉप 100” में भी नइखे।
 
खैर, हमार विवाद ओकरा टीआरपी आ लोकप्रियता पर नइखे, बल्कि हम चाहेब कि अगर रउरा अपना सेट पर कवनो सम्मानित हस्ती के बोला रहल बानी, त कम से कम ओकरा के ऊ सम्मान जरुर दीं, जेकर ऊ हकदार बाडे। गैर-भोजपुरिया जज लोग भोजपुरी के गायकन के केतना बढिया (?) से जज क रहल बा लोग, हम ओह पर भी कुछ ना कहब, पर ओह चैनल पर प्रसारित भइल कवनो गलत चीज खातिर त चैनल के जबाब देवे के ही पडी। सुर-संग्राम के सेट पर एह हफ्ता जवन कुछ भी भइल, कम से कम ओकर उम्मेद एगो भोजपुरी चैनल से त ना कइल जा सकेला।