Bhojpuria.com

सुर-संग्राम के शुरु भइला से लेके आज तक जवन बात हमनी के नजर में लगातार खटकत रहे, आ जवना बात के भोजपुरिया डॉट कॉम शुरु से लेके आज तक विरोध कइलस, ओह बात पर आखिरकार महुआ के भी झुके के पडल। उत्तर प्रदेश आ बिहार के बीच जारी एह जंग में अभूतपूर्व फैसला लेते हुये काल्ह महुआ मजबूर हो गइलस, उत्तर प्रदेश आ बिहार, दूनो के संयुक्त रुप से विजेता घोषित करे खातिर।

बात रहे विजेता के 25 लाख आ उप-विजेता के 11 लाख देवे के, लेकिन दूनो के 25-25 लाख देके महुआ एह मुद्दा से आपन जान छोडाये के कोशिस कइलस। एह इनाम के जीतला पर आलोक कुमार आ मोहन राठौर के भोजपुरिया डॉट कॉम का ओर से बधाई। जइसन कि हमनी का काल्हे लिखले रहनी कि अगर एह कार्यक्रम में कवनो भी एक टीम जीतल रहित, त खाली एह प्रोग्राम के रुप-रेखा का वजह से ओह विजेता के दोसरा राज्य में कवनो सम्मान त नाहिये मिलल रहित। वइसे एह मुद्दा पर हमनी का महुआ के भी धन्यवाद दिहल चाहेब, जवन कि भोजपुरिया लोगन के भावना के सम्मान कइलस।

अभी प्रोग्राम खतम भी ना भइल रहे कि हमनी का लगे लगातार बधाई संदेश आइल शुरु हो गइल। वइसे हमनी का इ बता दिहल चाहेब कि ई जीत हमनी के ना, बल्कि हमनी के समर्थक लाखों- करोडों भोजपुरिया लोगन के ह, जे शुरु से आज तक एह मुद्दा पर हमनी का संगे खडा रहल। ई जीत भोजपुरिया समाज के ह, जेकरा के कुछ लोग यूपी आ बिहार के नांव पर बाँटल चाहत रहे, जवन कि हमनी के कबो मंजूर ना भइल।

एह मौका पर भोजपुरिया डॉट कॉम अपना समर्थकन के धन्यवाद दिहल चाहता, आ बतावल चाहता कि खाली रउरा लोगन के सहयोग से आज तक हमनी का जवन भी मुद्दा (फिल्म इंडस्ट्री, समाज या कुछ आउर) पर विवाद शुरु कइनी, कवनो में हार के मुँह ना देखे के पडल। हमनी के आशा ही ना बल्कि पूरा विश्वास बा कि आगे से कवनो भी भोजपुरी के नाम पर चले वाली संस्था या चैनल, दोबारा भोजपुरी के आ भोजपुरियन के बाँटे के दुस्साहस ना करी।