Bhojpuria.com

बक्सर। पिछला मई महीना में बक्सर के एम वी कॉलेज के राजनीतिशास्त्र के विभागाध्यक्ष डा. रविकांत दुबे जी एगो अइसन ऐतिहासिक काम कइले बानी, जेकर जेतनो सराहना कइल जाव, कम बा। रविकांत जी बक्सर जइसन छोट शहर में रह के दुनिया के सबसे सबसे ताकतवर व्यक्ति अमेरिकी राष्ट्रपति बराक ओबामा के जीवनी लिखले बानी, आ एकर महत्व एह खातिर आउर भी बढ जाता काहें कि राष्ट्रपति बनला का बाद बराक ओबामा पर निकलल ई दुनिया भर में पहिला किताब हवे। एह किताब के कवनो भारतीय द्वारा बराक ओबामा पर लिखल पहिला किताब होखे के गौरव भी प्राप्त भइल बा।

"बराक ओबामा के जादुई व्यक्तित्व से ना सिर्फ हम, बल्कि सारा दुनिया प्रभावित बाटे। आ बिहार के एगो छोट शहर से हम उनका के एगो अइसन तोहफा देवे के कोशिस कइनी, जवन कि उनुकर सपना के अनुरुप बाटे। ओह बदलाव के सपना के, जवना के ऊ बात करत रहले अपना चुनाव प्रचार के दौरान। एगो अइसन समाज के सपना, जहाँ केहू जाति आ रंग से बड-छोट ना होई, बल्कि सबके अपना काम के बदौलत आगे बढे के मौका मिली..." रविकांत जी भोजपुरिया डॉट कॉम से एगो खास बातचीत में कहनी।

"ई शायद बराक ओबामा के असर ही रहे, जवन कि हमरा के बक्सर में होखला का बावजुदो ई किताब लिखे खातिर प्रेरित कइलस। एगो अइसन लइका जेकर माई आ बाबुजी अलग हो गइल, आ जेकरा नांव में हुसैन शब्द जुडल बा, का ओकरा से रउआ दुनिया के सबसे बड कुर्सी पर पहुँचे के अपेक्षा रख सकेनी? शायद ना, लेकिन इहे खास बा बराक ओबामा में, जवन कि उनुका के बाकी लोग से अलग रखेला। हम अपना किताब में उनुकर जिनगी के बहुत अनछूअल पहलुअन पर भी चर्चा कइले बानी", रविकांत जी कहनी।

“द हीरो ऑफ चेंजिंग वर्ल्ड: बराक ओबामा” नाम से अंग्रेजी में लिखल एह किताब में 300 से ज्यादा पन्ना में बराक ओबामा के बचपन से लेके उनुका राष्ट्रपति बनला तक के पूरा विवरण बाटे। मई महीना में प्रकाशित भइल एह किताब के एगो प्रति बराक ओबामा के भी डाक द्वारा भेजल गइल बा। 

अपना लेखन का बल पर राष्ट्रीय स्तर पर पहचान बना चुकल रविकांत जी के वैश्विक आर्थिक मंदी, भारत-श्रीलंका संबंध, आ भारतीय विदेश नीति जइसन विषय पर कई गो किताब प्रकाशित हो चुकल बाडी सन। भारत-श्रीलंका संबंध पर उनुकर किताब के विमोचन तत्कालिन राष्ट्रपति शंकर दयाल शर्मा कइले रहन। लोक प्रशासन नांव से लिखल उनुकर किताब के विमोचन बिहार के राज्यपाल ए. आर. किदवई द्वारा कइल गइल रहे। एकरा अलावा विभिन्न साहित्यिक आ सामाजिक संस्थन द्वारा इनका के सम्मानित भी कइल जा चुकल बा।